April 8, 2014
IST 9.15 AM
Tuesday


തണുപ്പാർന്ന പ്രഭാതങ്ങൾക്കരികിൽ
കത്തിയെരിയുന്നു വേനൽ
തണൽ മരച്ചില്ലകളിലെ ഗാനങ്ങൾ
കരിയിലകൾക്കിടയിൽ
സുഖ സ്മൃതിയേറ്റുന്നു
മഴനീർക്കണങ്ങളും കണ്ണുനീരുപ്പുമലിഞ്ഞ
സമുദ്രം ചക്രവാളത്തിനിതളിൽ
ഉൾക്കടലിൻ നിധിചേർത്തുവച്ച്
കവിതയെഴുതുന്നു
നിമിഷങ്ങളിഴ തുന്നും പ്രഭാതമേലാപ്പിൽ
ആകാശം നിതാന്തമായൊരു സ്വപ്നത്തിൻ
നക്ഷത്രത്തിളക്കത്തിൽ
പാതിയെഴുതിയ യുഗത്തിനിതളിൽ
പഴമനീറ്റിയ പുരാണങ്ങൾ
കരിയും ദിനങ്ങളിൽ
സുഗന്ധമേറ്റും അക്ഷരങ്ങൾ
നിറമൊഴിഞ്ഞ് ശുഭ്രമാം പളുങ്കുമണികൾ പോൽ
ഹൃദയം സൂക്ഷിക്കും അക്ഷരങ്ങൾ..